25 d'ottobre
'Un dischettu par tutti' : un prughjettu novu à prò di e persone svantagiate
L’associu « Tous pour chacun », gestitu da Wandis Le Hui, travaglia, cù artisti corsi è d’altrò, nantu à un prughjettu di dischettu. U scopu hè di racoglie mezi per l’associu ma sopratuttu di scambià u sguardu nantu à persone svantagiate.
Comu fà per ristablisce a parità cù e persone svantagiate ind’a nostra sucetà ? A questione merita d’esse posta. È s’ella tocca à pulitichi di favurizà un sguardu novu nantu à isse persone quì, di fà chì ognunu deve campà cù a so particularità, ci sò ghjente è associ chì travaglianu in u so scornu per fà scambià e cose. « Tous pour chacun », natu in u 2018, ne face parte. Gestitu da Wandis le Hui, issa struttura t’hà a particularità d’avè vinti persone svantagiate in u so cunsigliu d’amministrazione. « Avemu parechje missione, spiega Wandis Le Hui, sensibilizà a ghjente, favurizà l’inclusione d’issa populazione, travaglià nantu à prughjetti chì permetterianu di scambià u sguardu ch’è omu hà nantu à isse persone... »
Per risponde à isse missione, l’associu hà vulsutu travaglià nantu à una strategia precisa. Un travagliu messu in piazza ghjust’à puntu cù u cunsigliu d’amministrazione. Cusì, hè natu un prughjettu di dischettu chì, ci vole à dilla, avanza abbastanza bè.
« Avemu subbitu avutu l’accordu di u cumpunitore Pon, cumpare di u dischettu, aghjusta u capimachja di l’associu, à pocu à pocu, l’idea face a so strada, per sbuccà, speremu, nantu à un dischettu da quì à un annu. »
Parechji artisti francesi è stranieri sò dighjà stati cuntattati. Si tratta di Grand Corps Malade, Soprano, d’un artistu belgiu autistu chì hà datu u so accunsentu per una di e so canzone in u dischettu. « Avemu dinò, unu di i musicanti di Cabrel chì hè prontu à participà. »
L’idea hè d’allargà u prughjettu aldilà di a Corsica ma, di sicuru, di fà chè i nostri artisti pudessinu mette a so grinfia nantu à issu dischettu. Nantu à stu puntu quì, Antò Secondi, capimachja di u gruppu « Svegliu d’Isula », membru di l’associu, toccu direttamente, s’hè impegnatu. « Wandis m’hà prupostu d’aiutà lu nantu iss’idea quì, preciseghja l’artistu, parlà di a tematica di i svantagiati mi pari impurtanti par via di u sguardu ch’edda t’hà a ghjenti nantu à issi parsoni. Ci voli à fà scambià issu sguardu è ghjè unu di i scopi d’issu prughjettu. »
Un cuncettu hè abbastanza simplice : ogni artistu o persona, pocu impreme s’ella face parte o nò d’una struttura, pò scrive un testu è cumpone una canzona nantu à issa tematica quì. Tutte l’influenze ponu esse aduprate da u rock à u folk passendu per u reggae, u tradiziunale o u rap. Hè listessu per ciò chì tocca à e lingue : corsu, francese, talianu, spagnolu, inglese…L’artisti ponu fà u registramentu da per ellu o travaglià cù un studiò (un cuntattu serà fattu in issu sensu quì cù strutture corse...)
« U nosciu scopu, aghjusta Anthò Secondi, hè d’avè rizorzi finanziari par fà avanzà l’associu in i so missioni, ma dinò di apri a ghjenti nantu à a realità di ciò ch’eddi campani issa ghjenti. U sguardu cumencia à scambià. Semi passati da a « pietà » à un sguardu novu, ma ùn basta micca. U scopu hè di pudè viaghjà tutti insemi, ognunu cù a so particularità. »
U cuntattu s’hè apertu cù artisti corsi. Pierre Agostinetti hà dighjà datu u so accunsentu per participà è s’aspettanu e risposte da altri. Risposte ch’ùn tarderanu micca.
« Un dischettu par tutti » divaria esse prontu per u principiu di l’annu 2023. Nanzu à una fasa di cummercialisazione è à tempu di sensibilisazione. L’artisti corsi s’anu da, forse, impegnà à prò d’una tematica chì ci tocca tutti.
Origine : Giurnale di a Corsica
Artisti
Mostra 'Anthropocène' à a pulverera di a citadella d’Aiacciu sin'à u 30 d'aprile
5 d'aprile | Aiacciu
Noi, u primu dischettu di u gruppu L’Avvinta
23 di marzu | Corsica
Eterna lotta, u novu dischettu di L’Arcusgi pè i so 40 anni
16 di marzu | Corsica
A pruduttrice aiaccina di cinema Marie-Ange Luciani, premiu Daniel Toscan du Plantier 2024
17 di ferraghju | Parigi
'A me lengua', un dischettu in lingua bunifazinca
21 di dicembre | Corsica
Una canzona in omagiu à Natale Luciani partutu à l'altru mondu 20 anni fà
7 di dicembre | Corsica
Sbrisgiulimi di vita, u novu dischettu di Serge Vacca
30 di nuvembre | Corsica
'Dumane tù', u novu dischettu di Delfina Girolami
16 di nuvembre | Corsica
'Babbu è figliolu', u novu dischettu di Antoine è Jérôme Ciosi esce u primu di dicembre
16 di nuvembre | Corsica
Amore à suminera, u novu dischettu di Meridianu
7 di lugliu | Corsica
Live in L'Alboru, novu dischettu di Daniel Vincensini
7 di lugliu | Bastia
'Chjerchju di vita' di Vitalba pè i vint'anni di u gruppu
5 di lugliu | Corsica
Una donna corsa, autore di fascia figurativa : Caroline Nasica
5 di maghju | Corsica è Francia
Anna Lucia, u novu dischettu di Natale Vesperini
20 d'aprile | Corsica
U focu di a vita, u primu dischettu di Una Fiara Nova esce l'11 d'aprile
7 d'aprile | Corsica
Amparatemi à cantà, u novu dischettu di Felì
29 di marzu | Corsica
Da scunghjurà a sorti, u secondu dischettu di u gruppu Cuscenza
6 di dicembre | Corsica
Esciuta di u novu dischettu di Laurent Bruschini
30 di nuvembre | Corsica
Una strufata di u Dio vi salvi Regina cantata in a lingua di u Cristu
10 di nuvembre | Bunifaziu