Voce Nustrale

Nutiziale culturale

Bastia
9 di settembre

40u festivale Arte Mare (30 di settembre-9 d'ottobre)

U festivale di u filmu di e culture mediterranie di Bastia hà 40 anni. Ghjè u più anzianu festivale di Corsica. Natu in u 1982 durante u Riacquistu, hà sappiutu tesse leie trà una cultura corsa chì si face valè è culture mediterranie vicine. In u 2001, dopu à un'interruzzione d'un annu, u festivale di u filmu di e culture mediterranie lascia a piazza à u festivale di u filmu e di l’arti mediterranii. Una festa di l'arti mischjati. Purtatu da l'associu Arte Mare, hè cunnisciutu oghje ghjornu sott'à u nome di u festivale Arte Mare. Tutti l'anni, rimette u premiu litterariu Ulysse, attribuitu à un primu rumanzu è à un'opera sana. D'altrò, a cumpetizione di u filmu, appuntamentu maestru di l'innamurati di u cinema, vede sette opere cinematugrafiche in cumpetizione, cum'è tanti rispechji di e sucetà induve trovanu a so ispirazione. Ogni annu, u prugrammadore, Pierre De Gardebosc, in cullaburazione cù a squadra di u festivale, ci prupone una prugrammazione nova è di prima trinca cù filmi diffusati nanzu à a so esciuta ufficiale, è chì cuntribuiscenu à a rinomina di u festivale è à quella di a Corsica.  
 
A parte da u 2016, u festivale hà datu a pussibilità à i rializadori corsi di vince u premiu Arte Mare inaugurendu una sezzione cumpetizione di u filmu corsu. Dui premii sò attribuiti, unu di a finzione, l'altru di u documentariu. In u 2017, hè stata inaugurata a cumpetizione di u filmu di scole di cinema mediterranie. Una vintina di scole anu participatu. 7 filmi sò stati ritenuti è numerosi giovani rializadori sò ghjunti pè presentà i so filmi.
 
Arte Mare presenta dunque filmi di studianti è di cineasti famosi. In u 2022, u temu serà « L’anniversariu» ! – chì apre nant'à a storia di u cinema, un sguardu nant'à i filmi mediterranii premiati, nant'à quarant'anni di cinema corsu prupostu da Allindì, una sucetà aiaccina di diffusione in streaming, una sezzione 'Publicu Giovanu', i partenariati Cinemateca/Casa di Lume è Corsica.Doc, i filmi premiati à e Notte Med... U festivale principia venneri u 30 di settembre cù l’arrigistramentu publicu di a famosa emissione di France Inter, On va déguster, l'inaugurazione di e mostre di a galleria Noir et Blanc, è dui filmi presentati nanz'à a so surtita ufficiale. Si compie dumenica u 9 d'ottobre cù un grande cuncertu gratisi rigalatu da France Bleu RCFM chì festighjeghja dinù u so anniversariu. Arte Mare, ghjè dinù un scontru cù Julie Ruocco è Sylvia Cagninacci, chì anu vintu u premiu Ulysse di u primu rumanzu è cù u scrittore Dany Laferrière, chì riceverà u premiu Ulysse pè a so opera.
 
Sti 40 anni seranu festighjati cù quelli chì anu participatu à Arte Mare cù e so opere, a so presenza è sustegnu: i cineasti Nabil Ayouch, Noémie Lvovsky, Avi Mograbi, Radu Muntean, Julien Meynet, Marie-Jeanne Tomasi, l’ingegneru di u sonu André Rigaut, l'artisti è scrittori Sapho, Patrizia Poli, Laure Limongi, Annick Peigné-Giuly, Mahi Binebine, Maati Kabbal, Rachid Koraïchi, Laurent Delmas, Christophe Bourseiller, Denis Parent, u pruduttore François d’Artemare… Via, più di sessanta invitati pè sta festa di u Mediterraniu !
 

Infurmazione è riservazione : www.arte-mare.corsica

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza