Nutiziale culturale

Sta 42a edizione hà una prugrammazione mischjendu cinema cù più di settanta filmi diffusati nant’à cinque siti, litteratura, musica, pittura è gastronumia nant’à u tema “ Chì ci hè di novu o duttò ?” chì prumette numerose surprese. U tema rimanda à a famosa dumanda di Bugs Bunny pè una quistione d’attualità. A risposta à sta dumanda serà artistica è culturale. Cusì dice Michèle Corrotti, presidente di l'associu Arte Mare ancu s’ella ùn hè micca sicura chì Bugs Bunny aspetti una risposta. Per via di a chjuditura di u teatru, u festivale serà stallatu à i Centri Culturali l’Alb’Oru in Lupinu-Bastia, Carlu Rocchi in Biguglia, i cinema le Régent di Bastia, U Paradisu in Furiani, e bibliuteche è mediateche di Bastia è di Castagniccia, a Galleria Noir & Blanc di Bastia. I filmi seranu scumpartuti in parechje cumpetizione, in particulare e cumpetizione mediterrania, di u filmu corsu, di e scole di cinema, è averemu dinù tutti i filmi chì seranu diffusati nanz’à a so surtita ufficiale. 

 

 

In più di u cinema, a litteratura serà à l’onore cù u premiu Ulysse chì hà da ricumpensà a rumanzera taliana Milena Agus pè a so opera, è Sara Vallefuoco pè u so primu rumanzu. In quant’à a musica, un’« Open air party » hè prevista sabbatu u 28 di settembre davant’à L’Alboru, cù à u prugramma Moon Acoustic Live, un gruppu di musica lounge, pop rock, in parechje lingue. U 5 d’ottobre, cuncertu di l’orchestru d’armunia regiunale « Corsica armonia », induve si trova a Lira Municipale Bastiaccia, l’orchestru Aria d’Aiacciu, è altre furmazione.

 

 

L’arti visuali seranu dinù riprisentati cù parechje mostre. A galleria Noir & Blanc accuglierà a mostra « Arte è salute », mettendu in risaltu l’opere di l’artisti di A Sulana, un stabilimentu chì accoglie persone senza casa. Un’altra mostra di Zelda Colonna à l'Alb’Oru, presenterà i so anni di ricerca è di sperimentazione nant’à a persona cum’è ogettu di medecina cuntempuranea.  D’altrò, a bibliuteca patrimuniale spunerà tavule anatomiche risturate di u duttore Antomarchi.

 

 

U festivale propunerà dinù gastronumia cù un risturante di poca durata à L’Alboru è e so cene nustrale imaginate da u capicucinaru Quentin Sanchez di u risturante La Corniche in San Martinu di Lota, è appruntate da Sandrine Farrugia, una cucinara prufessiunale sperimentata. Infine, Arte Mare accuglierà persunalità diverse cum’è Pierre Jolivet, Sandrine Kiberlain, François Rollin, Eric Fraticelli, Hélène Frappat, Sofiane Zermani, Christophe Bourseiller, è tant’altre. E riservazione, i pass è biglietti sò in vendita nant’à u situ https://www.arte-mare.corsica/.