Voce Nustrale

Nutiziale culturale

Cervioni
10 d'aostu

Cervioni : u ritornu di Nuciola in festa i 20 è 21 d'aostu

Dopu à un’interruzzione per via di a crisa sanitaria, a festa di a nuciola volta in Cervioni i 20 è 21 d’aostu, sott’à a direzzione di u cumitatu di fiera presidatu da Etienne Lovisi. Dapoi più di vint’anni, l’evenimentu hè a fiertà di Cervioni. Artigiani, pruduttori è artisti seranu à l’onore. St’ultimi cù un spaziu di pittura sott’à l’arcade di a corte Ghjuvanni Simonetti. Duie cunferenze sò à u prugramma. Jean-Philippe Antolini hà da intervene sabbatu à 6 ore è mezu à u primu pianu di a merria. Dumenica à 8 ore è mezu di sera, si tratterà di storia di Corsica teatralizata cù l’associu Storia Corsa è Benjamin Casinelli. Una nuvità da scopre nant’à a piazza à a catedrale Sant’Eramu. 

In quant’à l’animazione, pala basca, quadrigliu, chjam’è rispondi, morra, ghjochi anziani è china. L’associu I culteghji corsi feranu una demustrazione di travagliu di stazzona. Un spaziu di ghjochi hè previstu pè i zitelli in a corte di u cullegiu. Musica è canti dinù cù “Giuventù Cerviuninca”, i giovani archetti di a scola di viulinu di Bastia, Dédé Sékli nant’à a piazzetta A Canonica, i cuncerti di i gruppi Eppo è Chjami Aghjalesi nant’à a Traversa. U cumpare è a cumare di a manifestazione sò u disegnadore Battì “U Cerviunincu” è Marie-Ange Geronimi. Un soffiu d’umurismu nant’à l’anziana capitale di a Corsica à a so ora nuciolina.

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza