Voce Nustrale

Nutiziale culturale

Cervioni
13 d'aostu

Da No es no à i Chjami è Rispondi cun l'ADECEC

L’ADECEC appronta dui evenimenti dumenica u 28 d’aostu è sabbatu u 24 di settembre in cunventu San Francescu di Cervioni. A prima manifestazione hè “No es No” in omagiu à tutte e donne pè mustrà chì l’ADECEC si primureghja di a donna corsa è di tutte e donne in generale. A donna corsa, sposa, figliola, surella, tenuta cara, tenendu caru chì ùn averà mai smeritatu malgradu a so pusizione ogni tantu duminente, ogni tantu passiva ma sempre presente quandu si piglia decisione. Lauda Guidicelli-Sbraggia, cerviuninca è cunsigliera esecutiva incaricata di i sporti, di l’ugualità trà omi è donne è di l’innuvazione suciale, hè a cumare di st’evenimentu. Sott’à a bandera di u cuncertu  “no es no”, sta ghjurnata serà dedicata à a cundizione feminile cù donne pè parlanne durante una reunione animata da Roland Frias è l’associu cullaburadore Donne sulidarie. Dopu, seguiterà u cuncertu mettendu in scena a canterina basca Anne Etchegoyen, Gwennyn a brittona, è a corsa Francine Massiani. In prima parte, u gruppu Luna Dea. Canterine è canterini di sfarente origine chì anu da addunì i so talenti pè creà un cuncertu di prima trinca chì l’ogettivu hè di mette à l’onore e donne, i so diritti è i so cumbatti di pettu à e viulenze contr’à elle.

Altru evenimentu : sabbatu u 24 di settembre, una ghjurnata di studii è di scambii ingiru à u cantu impruvisatu in u filu di a ghjurnata dedicata à Roccu Mambrini “U Rusignolu” d’estate 2020. A prima idea hè di fà cunnosce u più pussibule u “corpus” di cunniscenze di stu cantu specificu.pè fà valè u so aspettu patrimuniale. Pè sta ghjurnata, l’ADECEC hà sceltu di trattà u cantu impruvisatu fendu una presentazione generale di e sfarente situazione da una banda, è da l'altra banda parlà di trasmissione cù tutte l’iniziative è arnesi messi à prò di l’amparera. Cù e delegazione invitate (sarda, toscana, maltese è di e Baleare) è chì s’aghjunghjeranu à una delegazione corsa di specialisti nant’à a quistione, seranu trattate è apprufundite quistione ingiru à a situazione di u cantu impruvisatu, a so organisazione, a so dinamica è e so pruspettive d’amparera. L’idea hè di lancià una dinamica in Mediterraniu nant’à u cantu impruvisatu pè urganisà scontri è prugetti cumuni ghjuvendu à dà un soffiu novu à stu cantu è, perchè nò,  fallu ricunnosce da l’UNESCO. Un si tratta d’intellettualizà solu u Chjam’è rispondi ma di travaglià à prò di un avvicinamentu scientificu di sta pratica antica è micca solu in Corsica. Infine, di sera, sedute d’impruvisata sò previste cù ogni delegazione.

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza