Stazii “Natura è erburisazione” cù Francesca Desideri è Vincent Renoux

Stu staziu hè organisatu da un’innumarata di e piante chì hè digià intervenuta à l’ADECEC è da un passiunatu di e ricchezze di a natura. Si sò scontri à u monte Sant’Anghjulu, vicin’à Santa Riparata di Balagna. Ella prupunia una di e surtite casinchese pè scopre e piante, ellu dirigia un gruppu di stazianti pè amparà à campà in lochi naturali. Cusì principiava un’aventura cumuna chì prupone surtite in Corsica intitulate “Natura è erburisazione”. Pè Francesca Desideri, a Corsica hè u “so ortu strasurdinariu”. Dapoi a so zitellina, in un filu di un babbu pastore, hà amparatu assai. Ùn hè micca nè scientifica, nè butanista, ma hà amparatu da per ella un sapè pupulare. In quant’à Vincent Renoux, hà amparatu à cunnosce l’ambiente quandu a natura hè diventata u so “terrenu di ghjocu” predilettu. Cù l’associu “Corse survie aventures”, stu specialistu di u krav maga prupone stazii pè amparà à campà in lochi naturali.

I stazii “natura è erburisazione” sò spassighjate pè scopre erbe medicinale, alimentarie è cù tastature. A prima hè u 21 d’aprile in l’Ostriconi, dopu in Porri u 12 di maghju, è l’altra i primu è dui di ghjugnu à u San Petrone pè dui ghjorni è una notte di surprese è di magia. Francesca Desideri è Vincent Renoux presenteranu un sapè fà è un vocabulariu venendu da i gusti, i muschi, e visione di e piante di Corsica cù virtù pè a salute, u manghjà è a pella in leia cù e stagione. Sì vo site interessati da stu staziu, riservate a vostra piazza à u 06 19 38 86 26.