Voce Nustrale

Nutiziale culturale

Bastia
11 di ghjennaghju

L’associu « En couleurs » si spone à a galleria Noir et Blanc di Bastia

L’associu « En couleurs » prupone a so prima spusizione di ghjennaghju à a Galleria 'Noir et blanc' in Bastia, piazza à u merca. Sin'à u primu di ferraghju, appuntamentu cù l'opere di Toni Casalonga, Andria, Cathy Barthelemy, Celia Graziani è Chantal Pantanacce. Toni Casalonga ci spone 92 opere : intaglii, sculture, pitture.

Da zitella, à Andria li hè piaciuta a pittura. Dopu avè pigliatu corsi durante parechji anni vicinu à l’artista pittrice Erka, hà pussutu rializà u so sonniu. «Lasciu parlà i mo sintimi è u mo imaginariu senza cercà una significazione. Ciò ch'o facciu m'ampara ciò ch'o cercu. Ghjè un spaziu di quistiunamentu trà u sonniu è a rialità ma chì lascia una bella piazza à u sonniu, à l’assurdu è à u scunnisciutu. Ogni tantu, i gesti venenu naturale. Tuttu diventa allegru, felice è umanu.  E mo emuzione è u mo incunscente mi lascianu ripruduce paisaghji astratti, ma cercu sempre qualcosa di cuncretu. Pensu chì a pittura hè una libertà di linguaghju è soprattuttu di linguaghju visuale per via chì, in fatta fine, l'opera campa da u sguardu ch'omu li porta ». 

Cathy Barthélémy hè Aiaccina. Presenta un travagliu astrattu è figurativu assai persunale. «L'umanu hè a mo primura maestra, cù e so gioie, suffrenze, dubiti ».

Celia Graziani hà vistu i so primi passi in disegnu guidati da Benjamin Derry, un pittore ch'ella ammireghja. «Aghju studiatu a Storia di l'Arte in Parigi Sorbonne, l'Econumia è u Design di spaziu chì n'aghju fattu a mo prufessione. A pittura hè per mè un linguaghju chì face a leia trà l'internu è l'esternu, trà noi tutti, trà l'evenimenti, trà e cose;  un'interpretazione di u sonniu discitatu di a vita ». 

Chantal Pantanacce, nata in Parigi in u en 1952, hè artistu è prufessore d’arti plastichi cù 3 master suprani d’arte. In u 2011, ritrova u so ceppu corsu è si stalla in Oletta. Membra di l'indipendenti di u Grande Palazzu in Parigi, ghjuria di spusizione, hà spostu in u mondu sanu. U filu cunduttore di a so vita hè a creazione in ogni duminiu.

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza