Mostra Corsica 39-45 à u museu di Bastia

Sin’à u 23 di dicembre, sta mostra, rializata in u quadru di l’ottantesimu anniversariu di a liberazione di l’isula, permette di rivede cumu i Corsi anu campatu l’ultimu cunflittu mundiale. Ci truvemu quasi 500 ogetti, ogetti d’arte, documenti, una vintina di multimedia, terminali tattili, busti, uniformi d’epuca, stratti di giurnali, arme, vestiti, ogetti di a vita currente… L’itinerariu di a visita vi porta da i chjassi di a Resistenza à l’occupazione taliana, a cultura americana cù a ghjunta di i famosi GI, i strazi di un’isula fora di u mondu è sottumessa à u raziunamentu.

Avemu dinù a paura di a cunquista taliana di a Corsica, u statutu strategicu di l’isula pè l’Aliati, a participazione di i Corsi in l’Armata di Liberazione, a situazione terribule di i prigiuneri di guerra di u Stalag VB, l’insurrezzione di u primu dipartimentu francese liberatu d’ottobre 43. Sò stati racolti, ogetti chì contanu u campà di e famiglie, scunvoltu da u cunflittu, a puvertà di a ghjente è chì campava à straziera cum’ella pudia. Truvemu in particulare e cullezzione di l’associu Sintinelle chì raccoglie l’ogetti in leia cù a seconda guerra. Si pò dì ch’ellu ci era un sistemu D à l’usu corsu. D’altrò, i Corsi scoprenu i prudutti cunsumati da l’armata americana è l’american way of life. Ciò chì annunzia a sucetà di cunsumazione chì si sparghjerà più tardi.