Nutiziale culturale

Mostra fotograffica “Corsica 1943 : una memoria à a prova di u tempu” à a Cisterna, un novu locu culturale in Corti

L’anziana cisterna di a caserna Padoue era un locu militare trasfurmatu in spaziu di mostra in u quadru di u prugettu Citadella XXI, prugettu di cunservazione è di risturazione di a citadella di Corti, purtatu da a CDC. U spaziu hè statu rinnuvatu rispettendu l’anziana funzione militare di cisterna. A maestria d’opera hè di l’Attellu M-Elodie Mussier. Stu spaziu

accoglie sin’à u 15 di marzu di u 2024 a so prima manifestazione culturale : a mostra fotograffica “Corsica 1943 : una memoria à a prova di u tempu” di Roberto Battistini. Pè l’80u anniversariu di a liberazione di a Corsica, l’autore hà fattu un travagliu di ricerca fotograffica nant’à i cumbattanti ghjunti da l’altra sponda di u Mediterraniu è imbarcati nant’à u sottumarinu Casabianca pè participà à i cumbatti di a liberazione d’ottobre 43.

Mischjendu ritratti è video, a manifestazione presenta u cuntestu storicu di st’evenimenti mettendu in pruspettiva a storia è a memoria. Roberto Battestini hè statu giurnalistu fotograffu à famose riviste francese è internaziunale : Business Week International, Sunday Times, Figaro Magazine & Madame Figaro, Paris Match, VSD, Elle, Marie Claire, L’Expansion, Agences Gamma, SIPA, GLMR, etc. Hà fattu studii di cinema è à a scola naziunale di l’arti decurativi di Parigi. À u forte d’Ivry, dipartimentu di u Val-de-Marne, s’hè interessatu à l’archivii di a seconda guerra mundiale è in particulare à e fiure di a Corsica è di u sottumarinu Casabianca in 42-43 pè appruntà u so primu filmu chì accumpagnava un travagliu di ricerca storiografica presentatu à u museu di a Storia di l’immigrazione in Parigi.

Hà rializatu dinù u filmu “Corse 1943, les Passeurs de mémoire” chì accumpagna a mostra curtinese. In stu filmu, e fiure d’archivii di l’ECPAD (Stabilimentu di cumunicazione è di pruduzzione audiovisiva di a Difesa) sò essenziale. Sò u puntellu di u filmu, permettenu d’illustrà è di rende vivi e testimunianze di i resistenti è di l’anziani cumbattanti. 70 di e fiure sò state ricustituite.