Attualità

Nuciola in festa : i 20 è 21 d'aostu in Cervioni

I 20 è 21 d’aostu, serà a 21ima edizione di a festa di a nuciola in Cervioni cun numerosi artigiani, pruduttori è artisti à l’onore. Ma dinù a cultura cun duie cunferenze di Jean-Philippe Antolini pè evucà “e falsificazione di a storia di Corsica” u sabbatu à 6 ore è mezu à u primu pianu di a merria è dumenica à 8 ore è mezu di sera, si tratterà di storia di Corsica teatralizata cù l’associu Storia Corsa è Benjamin Casinelli. Una nuvità da scopre nant’à a piazza à a catedrale Sant’Eramu.

In quant’à l’animazione, pala basca, quadrigliu, chjam’è rispondi, morra, ghjochi anziani è china, dimustrazione di I culteghji corsi. Un spaziu di ghjochi hè previstu pè i zitelli in a corte di u cullegiu. Musica è canti dinù cù “Giuventù Cerviuninca”, i giovani archetti di a scola di viulinu di Bastia, Dédé Sékli nant’à a piazzetta A Canonica, i cuncerti di i gruppi Eppo è Chjami Aghjalesi nant’à a Traversa. U cumpare è a cumare di a manifestazione sò u disegnadore Battì “U Cerviunincu” è Marie-Ange Geronimi. Un soffiu d’umurismu nant’à l’anziana capitale di a Corsica à l’ora nuciulina.