Nutiziale culturale

Pè cummemurà l’anniversariu di u famosu canterinu corsu cunnisciutu in u mondu sanu, a so cità nativa Aiacciu organiseghja numerosi evenimenti à parte da u 20 di lugliu è durante a seconda parte di l’annu.

 

Tino Rossi, ghjè l’anima d’Aiacciu. Un monumentu di u patrimoniu aiaccinu chì nunda predestinava à diventà una celebrità di a canzona essendu natu in u 1907, carrughju Fesch ind’una famiglia mudesta d’8 zitelli. Rinumatu pè u famosu Petit Papa Noël à l’eternu successu, Vieni... Vieni... firmata 28 settimane in testa di u Hit-Parade americanu, O Ciucciarella, prima canzona in lingua corsa avendu ottenutu un discu d’oru.

 

D’altrò, l’omagiu serà dinù pè quellu ch’hà fattu a prumuzione di a Corsica è d’Aiacciu in particulare. E cummemurazione principieranu ghjovi u 20 di lugliu ind’a corte di u museu Fesch cù un cuncertu di e più famose canzone di l’artistu direttu da Bertrand Cervera. Canteranu in particulare Mai Pesce è Petru Santu Gelfucci. L’omagiu serà dinù cinematugraficu cù l’attore Tino Rossi ch’hà ghjucatu in più di 30 filmi, frà quessi “La Belle meunière”, primu filmu in culore rializatu da Marcel Pagnol ». Filmi seranu diffusati d’altronde da a cinemateca di Corsica. Hè prevista una mostra di ritratti in cullaburazione cù Paris Match, da u 10 d’aostu à u 20 di settembre nant’à a piazza Foch. Visite guidate i 14, 21 è 28 di settembre, cù l’Uffiziu Intercumunale di Turismu di u paese aiaccinu permetteranu di marchjà in i passi di l’artistu è un spettaculu serà organisatu st’invernu. A cità prevede dinù una sottuscrizzione pupulare pè rialisà un bustu, di dà u nome di Tino Rossi à a scola di a residenza di l’isule è di fallu cunnosce in tutte e scole di a cità, a so vita, e so riesciute pè mantene u so ricordu ind’e nove generazione.