Nutiziale culturale

A Corsica, rinumata pè i so festivali cinematugrafichi è litterari, s’appronta à accoglie un novu : Isuli Mondi direttu da Anne-Marie Luciani à u Lazaret in Aiacciu da u 21 à u 24 di settembre. L’evenimentu vole celebrà pè a prima volta a diversità culturale di l’isule di u mondu à livellu di u cinema, di a litteratura è di l’arte. L’ogettivu hè dinù d’accoglie ogni annu un’isula sfarente pè cunnosce un universu culturale scunnisciutu o pocu cunnisciutu è fà una leia cù a Corsica.

 

A prima isula invitata hè l’Islanda, una terra enimmatica cù paisaghji magnifichi. Cusì, durante sti quattru ghjorni, parechje discipline artistiche si scuntreranu pè cunnosce megliu stu paese : da l'arte cinematugraficu à i scontri litterari, e mostre di ritratti, i spettaculi di a giuventù, e stonde musicale, e tastature culinarie. I cinema aiaccini, Ellipse è Laetitia, presenteranu filmi islandesi è a so cultura, in particulare e sagà medievale. U cinema corsu serà dinù à l’onore. L’ecolugia serà un temu centrale in e discussione cù l’imbusche chì cuncernanu e duie isule. Sti scontri permetteranu d’evucà e sperienze, e sperimentazione è prugetti alternativi pè un avvene à longu andà.

 

Cù stu festivale chì permette di guardà l’isule è di paragunalle, ghjè una manera di scopre a diversità di u mondu è ancu megliu cunnosce à noi stessi per via chì ancu l’isule e più luntane anu assai punti cumuni cù a nostra. Appuntamentu dunque cù i viking, e balene, i piscadori di baccalà, un populu curagiosu.