Nutiziale culturale

Riapertura di u parcu Galea di Tagliu Isulaccia

In st’annu 2023, u parcu Galea prupone più chè mai di fà dialugà e culture, circulà e cunniscenze è campà u dibattitu grazia à un novu ciclu di cunferenze principiendu cù un primu sugettu forte è simbolicu : u cumbattu di e donne iraniane pè a so libertà cù Chowra Makaremi, antropologa iraniana dumane à 3 ore. Sta prima cunferenza serà aperta cù una visiocunferenza di u sociologu Edgard Morin, 102 anni, unu di i più famosi pensadori di stu seculu chì venerà à u Parcu Galea di veranu. A prugrammazione di u Parcu tratterà di parechje tematiche d’attualità: da l’urgenza ecologica à i metalli rari, e minacce contr’à l’oceani, l’affari di u football mundiale, a geopulutica di a moda. Sti scontri duminicali seranu l’occasione di sapè à chì ne simu nant’à l’ultimi prugressi di a ricerca scientifica cum’è u funziunamentu di u nostru cervellu, e malatie neurodegenerative, l’eredità, a psicolugia pusitiva, a medecina integrativa, u linguaghju animale. A tempu, i passiunati di sapè puderanu amparà assai nant’à a grande storia di u Mediterraniu, e sucetà secrete, u passatu di e civilizazione preculumbiane, l’origine di e lingue, u putere di a natura nant’à a salute, l’impurtanza di a musica ind’e nostre vite, o a bellezza di e matematiche

In più, ogni dumenica nanz’à a cunferenza di 3 ore, una cullaburazione nova cù l’università di Corsica nant’à “Ricerca, l’appuntamenti di l’università”. Cusì, insignanti è cercadori sparteranu e so cunniscenze è i so travaglii cù u publicu. Infine, i zitelli ùn sò micca sminticati, cù stazii d‘amparera è grande aventure st’estate permettendu cusì à i genitori di seguità e cunferenze.