Nutiziale culturale

Stu festivale presenta talenti lucali pè un prugramma di lettura teatrale, stand up, impruvisata, burlescu corsu. A prima serata, luni u 18, Esther Cristiani pruponerà “Dans la forêt”, una lettura teatralizata di fintascenza nant’à l’aventura di duie giovane surelle. Ognuna porta e speranze di a giuventù, diventà scrittrice pè Neil, entre ind’una grande scola di ballu pè Eva. Ma, preservate da u so babbu da a situazione di u mondu, è in un cuntestu d’arrestu prugressivu di i servizii di basa di u statu, cum’è l’interruzzione di l’elettricità, deveranu amparà à campichjulà, à manghjà altrimente, fà cunfidenza à a natura, ma dinù liberassi è dì addiu à i so sogni di zitellina pè ingrandà è rientre da veru… in a furesta. Spettaculu micca per i zitelli di menu di 10 anni.

 

Marti u 19, u stand up d’Anouk Langaney cù “Inqualifiable”. A cumediante evucherà “tuttu ciò chì l’impenserisce o l’annerba”. Un spettaculu micca per i zitelli di menu di 10 anni. A tempu, l’autor Anouk Langaney esce “Soupçons”, a seguita litteraria di u “Temps des hordes”, una seria di finzione passiunante nant’à Aiacciu in u 2037.

Mercuri u 20, u spettaculu d’impruvisata di a tribù comica “I Furiosi” cù duie squadre, un arbitru, ghjucadori, un publicu incaricatu di vutà pè e so impruvisate preferite : eccu l’elementi d’una forma teatrale originale, stimulante è chì suprende pè un spettaculu ghjucatu una sola volta ! A so direttrice Fanny Carré hà da assicurà un staziu di scuperta di l’impruvisata pè tutti.

 

Ghjovi u 21, François-Xavier Marchi è Carole Maranelli evucheghjanu i ricordi è cumbatti d’una donna corsa, Toussainte Conti. Infine, venneri u 22, l’opera di “Teatru Nustrali”: ”pittura, Cultura è Caricatura” scritta da Petru Squarcini nant’à u tema di i pittori corsi à u museu Fesch. Ingiru à st’artisti, una visita strana hà da organisassi trà un guardianu di u museu ghjuntu da un’altra epuca, un’istitutrice scema senza pedagugia, un psichiatru scimignulitu chì preferisce accoglie i so pazienti ind’u museu. A so sola cliente hè una donna pretaghja. Infine, Waffà l'aiutu in casa di a nostra Margarita naziunale s’hè persu in Aiacciu pè rituvassi in u museu è cunnosce u so patrimoniu megliu chè l’isulani..

 

Riservazione : https://www.eboutique.ajaccio-tourisme.com/