Nutiziale culturale

Da u 22 à u 24 di settembre, u museu di Bastia accoglie a 7a edizione di i Scontri Litterari di Libri Mondi chì hà invitatu sette famosi autori: dui taliani, Carlo Lucarelli è Antonio Scurati, l’Irlandese Sebastian Barry, l'Americanu Jerry Stahl è e francese Marie Vingtras, Noëlle Renaude è Pascale Robert-Diard.

 

Pè sta setttesima edizione, u direttore di u festivale Sébastien Bonifay vole cunnosce e pruposte di u publicu pè chì Libri Mondi sia sempre in armunia cun ellu. Un picculu quistiunariu serà dispunibule à l’entrata di e cunferenze. Libri Mondi si primureghja dinù di sensibilizà u publicu è l’elevi pè a prossima edizione. U scopu hè di migliurà sempre u festivale.

 

Eccu avà una presentazione di l’autori : Sebastian Barry, puetu, autore dramaticu è rumanzeru irlandese. U so ultimu rumanzu “Au bon vieux temps de Dieu” conta un anzianu pulizzeru sulitariu chì ritrova un passatu adduluratu.  Dopu, Jerry Stahl, autore di rumanzi pulizzeri ghjudeu americanu dinunzia in unu di i so rumanzi “Nein, nein, nein”, a trasfurmazione di lochi di memoria di a Shoah in parchi d’attrazzione. Carlo Lucarelli è Antonio Scurati studieghjanu in i so ultimi libri u fascisimu durante a seconda guerra mundiale. Pascale Robert-Diard, una di e cruniste ghjudiziaire e più famose di Francia chì conta i più grandi prucessi in u giurnale “Le Monde”, Noëlle Renaude, autora dramatica, rumanzera è Marie Vingtras, avucata è chì hà ricevutu u Premiu di i librari 2022 pè u so primu rumanzu “Blizzard”.