Attualità

U ventu di a morte

U ventu di a morte hà suffiatu eri nant’à a Corsica, cun sbuffulate sopr’à 200 ch/ora, acquate, grandina è un’attività elettrica impurtante. Ci sò state cinque vittime. I drami sò accaduti in Sagone è in Calvi induve una zitella di 13 anni in vacanze cù a so famiglia in un campeghju è un omu di 46 anni anu persu a vita, vittime di a caduta d’arburi nant’à e so abitazione. 

Nant’à a marina di u Liamone una donna di una settantina d’anni hè stata inticciata da un tettu strappatu d’un stabilimentu di bor di mare. In Girolata un piscadore di 62 anni è in Erbalonga un omu di 60 anni sò stati ritrovi senza vita. Una decina di persone sò state ferite, frà elle duie in urgenza assuluta. Millaie di persone sinistrate sò state rilughjate. Dipoi eri numerose persone sò sempre prive d’elettricità.

U ministru di l’internu Gérald Darmanin hè ghjuntu in Corsica per porghje u so sustegnu. Accumpagnatu di Gilles Simeoni è u prefettu di Corsica Amaury de Saint Quentin, hà visitatu u campeghju di Sagone. Oghje si renderà in Calvi.

Elisabeth Borne, a prima ministra, hà annunziatu a creazione d’una cellula interministeriale di crisa di fronte à a situazione in Corsica induve a timpesta hà fattu cinque morti è parechji feriti