Cunferenza nant’à i cultelli è i stiletti corsi cù Jean Biancucci sabbatu u 20 d’aprile à duie ore è mezu à u museu di l’Alta Rocca in Livia

Jean Biancucci, artigianu cultellaghju, merre di Cuttoli Curtichjatu è cunsiglieru à l’assemblea di Corsica, hà vulsutu cuntà a storia di i cultelli è stiletti corsi. Cusì, publicheghja l’infurmazione racolte dapoi u principiu di l’anni nuvanta. L’autore presenta u ripertoriu di tutti i cultelli di i rughjoni corsi pè avè mudelli è riferenze permanente è ripruduce cusì cultelli anziani in u so attellu. Esiste dunque parechji mudelli di cultelli corsi lacati da l’anziani dapoi omancu u medievu. A so evuluzione hè in leia cù e ferrere di Capicorsu, l’impurtazione di u minerale da l’isula d’Elba, è u sapè fà di l’artigiani stazzunari. A u XVIu seculu, i maestri di focu di a valle di Siscu creanu a corsesca, una specia di lancia, ma dinù falce è altri cultelli currenti aduprati in famiglia o ind’i macelli.

In stu filu, Jean Biancucci evucheghja l’alti furnelli di Toga in Bastia, Sulinzara o Ota-Portu, i carbunari, e famiglie di stazzunari, l’armuraghji cultellaghji è a so visione decurativa di u stilettu, u cultellu ricordu chì piace à i turisti. In quant’à u cultellu Vindetta chì hà successu vicin’à i corsi è turisti, ci vole à sapè chì hè un falsu cultellu corsu. Hè fabricatu d’altronde in l’attelli di Thiers in u Puy de Dome. Biancucci cita dinù l’anni 70 quandu i cultellaghji eranu quasi tutti spariti è a perioda di u Riacquistu. Cù stu libru, l’autore hà vulsutu ghjust’appuntu riacquistà pè ghjunghje à una prufessione chì oghje ghjornu hè una curpurazione viva, inventiva è creativa.