Nutiziale culturale

Voci di a Gravona : 40 anni

St’anniversariu serà festighjatu durante un cuncertu venneri l’8 di dicembre à u Palatinu in Aiacciu à 8 ore è mezu pè a festa di a nazione. Stu gruppu prusegue una dimarchja iniziata in l’anni 70 pè rispettà è mantene i fili di a memoria chì leianu à u passatu è à tempu descrivenu u presente. Dopu avè piantatu e so attività, a furmazione hè vultata in u 2021 cù novi visi è un novu dischettu epunimu di 14 tituli.

40 anni fà, hà principiatu l’aventura Voce di a Gravona cù i dischi “Spaventu” et “Terra” è dinù qualchì titulu maestru di a canzona corsa cum’è “Quand’eddi m’accurdarani” o “Scrivu à tè”. Una squadra ingiuvanita hà decisu di ripiglià a fiaccula. Ingiru à militanti culturali cum’è Paul Tradi, u gruppu s’hè strutturatu à pocu à pocu. Anu creatu una scola di cantu è di viulinu ind’a Gravona è a tempu anu ricustituitu u gruppu cù sempre u so militantismu culturale. Prestu prestu, l’idea d’un novu dischettu hè nata. L’opera purtendu cum’è titulu u nome Voci di a Gravona hè stata arrigistrata à u studio Ricordu. 14 tituli cù sugetti d’ispirazione varii. I temi di u gruppu fermanu d’attualità, cum’è un’arradichera à a so terra, a so natura è tradizione, e so legende. Qualchì aria ci porta nant’à i chjassi di i stazzi muntagnoli. Ma i canterini mandanu soprattuttu messagi fundati nant’à i so custatti di a sucetà attuale : a ruralità chì si more, una corsa à l’urbanisazione speculativa, a precarità, u disimpiegu di i giovani è tanti altri mali.”