Attualità

A vigilenza mantenuta

S’ella era stata prulungata sin’à sta mane a vigilenza arancia piogge-inundazione , una vigilenza gialla pè piene è marosuli hè stabilita pè u dopu meziornu. E precipitazione anu pruvucatu impurtante perturbazione nant’à a reta stradale, anzituttu in piaghja urientale, in u Fium’Orbu, a Castagniccia è u centru Corsica. U Tavignanu hè sburdatu nant’à a strada d’Aleria, è u Taravu in Palneca, un scogliu hè cascatu à mezu strada di a cumuna di Chisà nant’à a dipartimentale 645. Nove perturbazione sò a prevede oghje in numerosi settori, secondu l’annunziu fattu da a prefettura di Pumonte. In cismonte fiumi è mare fermanu sott’à alta surveglienza cù risichi di piena è di marosu. A  più grande prudenza ferma ricumandata.