A lingua di Molière, quattr’opere bislingue à l’edizione Parti des oiseaux

St’edizione hà publicatu una seria d’opere di Molière tradutte è adattate in lingua corsa : “U fintu malatu”, “E preziose”, “ E donne sapiente”. Ghjè a cuntinuità d’una prima traduzzione “U medicu pà forza” (Le medecin malgré lui) esciuta in u 2020 à l’iniziativa di Simon De Muru-Antona, rispunsevule di “Le parti des oiseaux”. Ci vulia l’idea precisa d’aduprà parechji parlati di l’isula cù altri autori dopu à Stefanu Conca è Ceccè Lanfranchi ch’avianu traduttu “U medicu pà forza”, ognunu in a so parlata. Cusì, Ghjuvan Federicu Terrazzoni, cunnisciutu per i so scritti, u chjama è rispondi è u so impegnu è Paulu Vincente Mucchielli, prufessore di corsu, scrittore è cantadore, anu traduttu pè u primu “Le malade imaginaire” diventendu “U fintu malatu” è “Les précieuses ridicules” diventendu “E preziose”. Stefanu Conca hà scunfinitu “Les femmes savantes” chì diventa “ E donne sapiente”. A tempu, s’hè publicatu i quattru libri in corsu è francese. Si ponu cummandà nant’à https://fr.ulule.com. Un quintu libru addunisce i quattru ma solu in lingua corsa. 

In u so prugettu, Simon De Muru-Antona vole andà più luntanu chè a sola traduzzione. Dunque, un veru prugettu pedagogicu chì face travaglià i sculari nant’à st’opere. Per quessa, hè statu cuntattatu Petru Squarcini, capimachja di u “Teatru Nustrali” per mette in scena pezzatelli di “ E donne sapiente” in scole aiaccine. Oramai, u scopu hè di cuntinuà, allargà à tutte l’opere di Molière, fà intervenzione in l’insignamentu secundariu, chì certi scritti li sò più adatti. Simon De Muru-Antona hà l’idea dinò d’allargà u so prugettu à d’altre tematiche.