Assemblea di Corsica: energia è mullizzu

Eri, à l'Assemblea di Corsica, l’eletti territuriali anu vutatu, à l’unanimità,  un raportu nant’à a prugrammazione pluriannuale di l’energia pè a perioda 2020-2028. Sta prugrammazione custerà 5 miliardi d’euri pè ottene l’autonumia energetica in u 2050 cù l’energie rinnuvellevule. U raportu uffizializeghja a ghjunta di u gasu naturale, a nova centrale di u Ricantu in Aiacciu è u sviluppu di l’energie rinnuvellevule. Pè u trattamentu di u mullizzu, u gruppu di diritta, presidatu da Jean-Martin Mondoloni, pensa chì a pupulazione deve sceglie trà interru, valurizazione energetica, espurtazione.