Attualità

Casi di covid à l'uspidale di Bastia, à a piscina Pascal Rossini è à u Statu civile d'Aiacciu

Cinque casi di Covid-19 sò stati scuperti in u serviziu di e risorse umane à l’uspidale di Bastia. Ste persone sò state isulate è e nove vistichere fatte dopu ùn anu datu altri risultati pusitivi. D'altrò, st’ultimi ghjorni, trè novi cluster sò stati identificati in Bastia. Dui in lochi prufessiunali cù in tuttu 9 persone cuntaminate è unu in un locu spurtivu cù 3 persone. Ricerche si facenu pè truvà i casi cuntatti. In Aiacciu, a piscina Pascal Rossini d'Aiacciu hè chjosa pè qualchì ghjornu dopu à a scuperta d’un casu di  covid è u secondu agente di u Statu civile hè statu dichjaratu pusitivu. In l’isula, 35 persone sò uspidalizate (23 in Cismonte è 12 in Pumonte), sei in rianimazione (quattru in Cismonte è duie in Pumonte).