Coronavirus in Corsica

U presidente di a Republica hà annunziatu dispusizione restrittive. Emmanuel Macron hà annunziatu u riportu di u secondu giru di l’elezzione municipale, a chjuditura di e fruntiere di u spaziu Schengen, u sustegnu à l’intraprese, salariati è à i più sfavurizati.

In Corsica sò oramai 126 persone chì sò pusitive à u Coronavirus è 7 persone ne sò morte. Frà elle l’omu puliticu Nicolas Alfonsi, 83 anni, anzianu merre di Piana è anzianu senatore radicale di manca in pumonte. Uspitalizatu dipoi parechji ghjorni era statu analisatu pusitivu à u Covid 19 mà avia dinù grave patulugie.

Hè dumandatu à a pupulazione d’aduttà un cumpurtamentu rispunsevule per i spiazzamenti. Ci vole un'attestazione di spiazzamentu derugatoria. Un dispusitivu di cuntrollu serà messu in piazza da e forze di l’ordine per fà rispettà u cunfinamentu. Si e regule ùn sò micca rispettate ci puderanu esse amende da 38 sin’à 135 euri.

Dopu à l’annunzii di u guvernu in un cumunicatu u vescu di Corsica hà annunziatu  ch’ell’ùn celebrerà micca a messa di a Madonuccia chì devia esse ritrasmessa à a televisiò.

E farmacie di l’isula aspettanu i maschi per i liberali chi deverebbenu ghjunghje assai prestu. A prescrizzione di i medicamenti so state prurugate. E cunsequenze di u coronavirus si facenu risente dinù nant’à l’econumia corsa. D'altrò, e linee marittime versu a Corsica sò mantenute partendu da Tulò.

L’attori ecunomichi riflettenu à minimizà è e perdite. Infine, i sindicati di Corsica seranu adduniti dumane dopu meziornu durante una reunione in visiocunferenza ind’e prefetture di Bastia è Aiacciu. A CGT serà presente pè chì tutti i mezi sianu dati à i stabilimenti di salute in Corsica è chì ogni salariatu tenghi listessa paga.