Attualità

Disparizione di l’artistu Dominique Degli Esposti

Si n’hè andatu à l’altru mondu Dominique Degli Esposti. U talentu di st’artistu s’hè vistu in u teatru, u ritrattu, a pittura, u cinema… Stu talentu camperà sempre in e so opere.  Mancherà assai à u mondu di a cultura è à a Corsica sana. 

St’omu discretu hà sempre preferitu lascià parlà e so opere à a so piazza.  Hè natu ind’una famiglia taliana in u 1946 in A Venzulasca prima di fà i so studii in Bastia. A u liceu di sta cità, principia à pinghje in a sezzione artistica è ampara a messa in scena.  U so prufessore hè u pittore José Lorenzi, chì li trasmette a so passione pè st’arte è pè u so mistieru postu chì Dominique Degli Esposti décide di raghjunghje Parigi pè furmassi è diventà un grande prufessore d’arti plastichi. Prestu prestu, frequenteghja i lochi artistichi di a capitale. Hè amicu cù Françoise Sagan è si rende spessu à u teatru de la Huchette.

In Corsica, hà rialisatu u fimu Brusgiature durante u Riacquistu in u 1972  nant’à a marina di Nonza. U so filmu hè cum’è una canzona pupulare, evucheghja l’amore è a brama preciseghja l’artistu. Hè dinù unu di i primi induve l’attori parlanu in corsu. Hè presentatu in u 1983 à u Festivale di u filmu e di e culture mediterranie (u futuru Arte Mare). U listessu annu Dominique Degli Esposti hè fattu cavalieru in l’ordine naziunale di l’arti è di e lettere.

Brusgiature ottene u premiu di u cunsigliu internaziunale pè u cinema è a televisione attribuitu da l’Unesco è hè selezziunatu à u festivale di Cannes.  D’altrò, cù u so amicu cumpunidore Maurice Fleuret, Dominique Degli Esposti crea in l’isula i “Paese in luce”, o messe in festa. Opere cullaburative ingiru à a musica è u ritrattu cù a participazione di e cumune. Ci vole à sapè dinù chì hè unu di l’iniziadori di a Festa di a musica.

A tempu, u so travagliu fotograficu hè spostu in Corsica, in Sardegna è in u 2012 à a biennale di Venezia. Eppuru, essendu discretu è umile, ripetia ch’ellu ùn ne avia micca bisognu. Li piace à creà ma li basta à esse prufessore. Quand’ellu amparò a so malatia, hà pensatu capunanzu à i so amichi è dicia : “Solu u silenziu hè grande, u restu hè debulezza”. Hè capita chì oramai l’artistu lascia un silenziu tamantu daretu à ellu.