Attualità

Elezzione municipale: Vittorie di Simeoni in Bastia, Sbraggia in Aiacciu è Benedetti in Sartè

Si vutava eri in solu sette cumune di Corsica per u secondu giru di l'elezzione muncipale: Aiacciu, Bastia, Sartè, Carghjese, Ota, Muru è Tocchisu. 65 891 scritti  avianu à sceglie trà 16 liste. E vittorie di Gilles Simeoni in Bastia, Stéphane Sbraggia in Aiacciu è Paul-Felix Benedetti in Sartè, definiscenu i novi cuntorni di u paisaghju puliticu isulanu.

In Bastia, induv’è a participazione hè stata di 68,52 %, corta vittoria di Bastia Inseme cundutta da Gilles Simeoni, cun 44, 49 % sia 6825 voci, davant’à Julien Morganti chi s’impone cume u principale opposante cun  41,68 % è 6394 voci. Nicolas Battini ottene 13,84 % è 2123 voci è face un entrata inedita à u cunsigliu municipale.

In Aiacciu, Stéphane Sbraggia u merre surtante, cunserva a citadella cun 46,51% è 11 033 voci. Cù a so lista anu riesciutu a sfida di sorte vincidori di a triangulare contr’à u candidatu naziunalistu Jean-Paul Carrolaggi chì ottene 40,85% cun 9689 voci è u capu di fila di u RN in Corsica, François Filoni chì hà riunitu 2999 voci per 12,94 % di i sprimati. A participazione in Aiacciu hè stata di 65,51%

In Sartè , Paul-Felix Benedetti elettu cun 54,85% diventa u primu merre naziunalistu di a cità dop’à 25 anni di duminazione di a diritta dipoi a disfatta di Dumenicu Bucchini in 2001. Era oppostu in issu secondu giru à Christophe Mondoloni, u candidatu sustenutu di a municipalità escente, chì hà ottenutu 45,15% di i voti sprimati d’una cumuna induve a participazione hè stata di 90,8%. 

In a cumuna di Muru in Balagna, hè stata eletta Laetitia Leonetti, chì diventa a prima donna à occupà u fottogliu di merre. Hà ottenutu 53,80% di i suffragiu, davant’à Christophe Moretti, 46,20%

In Tocchisu, vittoria di François Durastanti, cun solu sette voci d’avanzu in un scrutinu particularmente strettu in issa piccula cumuna di 173 iscritti induve 146 si sò sprimati. Cun 75 voci, François Durastanti oppostu à Brigitte Ottaviani chì riunisce 68 voci, mette fine à 30 anni d’opposizione

In Carghjese hè statu elettu Jean-Claude Donzella contr’à Jérôme Alessandri, è succede à François Garidacci u merre escente.

Infine in Ota, Dominique Maranelli hà vintu contr’à Toussaint Maranelli, dui candidati senza etichetta.