Ghjelu murtale pè e vigne

A notte da u 7 à l’8 d’aprile, e temperature sò calate assai in u stremu sudu di l’isula è in Patrimoniu, fendu chì u ghjelu hà distruttu parechje spluttazione agricule. Sin’à 60 % di perdite sò custattate. Ricevuti in Prefettura, i prufessiunali di u vinu dumandanu una calata di e cariche suciale è di pudè cumprà uva sì a pruduzzione hè troppu debule. I viticultori chì anu persu omancu 30% di a so pruduzzione puderanu ottene u regime di e calamità agricule, finanzatu da u Statu. Joseph Colombani, presidente di a camera d'agricultura di Cismonte, spera chì st’indennizazione si feranu più prestu chè quelle previste pè a timpesta Fabien di dicembre 2019,  chì e vittime aspettanu sempre.