Attualità

In ogni locu in Corsica si prega per Papa Francescu

I fideli si sò aduniti eri sera in numerose chjese di Corsica per una stonda di prighere per Papa Francescu mortu issu luni di pasqua, à l’età 88 anni. Cume ignilocu in u mondu, si rende ummagiu à u papa di i poveri. Hè statu u primu papa à chjamassi Francescu, in riferenza à San Francescu d’Assise, è u primu papa di l’epuca muderna, à avè rottu di manera significativa è curagiosa cun a tradizione recente di a chjesa catolica. Papa Francescu firmerà in e memorie è in a storia, cume un esempiu di cumpassione, d’umilità impegnatu per a pace è per un mondu più ghjustu.

A so salma serà trasferita sta mane à a basilica Santu Petru di Roma per esse sposta à i fideli, senza catafalcu, cun simplicità è sobrietà seconda a so vulintà. E so esequie seranu celebrate sabbatu matina nant’à a piazza Santu Petru è dop’à à a messa a bara serà trasferita à a basilica Santa Maria Maggiore induve u Papa hà sceltu d’esse sepoltu.