Interru di u mullizzu : a CDC ricusa i prugetti di Vighjaneddu è Ghjuncaghju

Eri dopu meziornu, l’Esecutivu di a CDC hà dinunziatu u Statu chì s’hè dichjaratu favurevule à i prugetti privati di Ghjuncaghju è Vighjaneddu 2. Sti prugetti ùn sò micca in u Pianu di a CDC chì raccumanda una maestria publica di a gestione. L’Esecutivu hà dumandatu dinù à u Statu ch’ellu participeghji à una nova reunione cù a CDC, u SYVADEC è l’intercumunalità pè truvà altre alternative. Eri dinù, 300 persone si so addunite in Aleria pè ricusà a custruzzione di u centru d’interru di u mullizzu in Ghjuncaghju. Stu dopu meziornu, à 3 ore un’addunita hè prevista à l’invitu di u cullettivu Valincu Lindu davant’à a cumunità di cumune di u Sartinese-Valincu-Taravu, in Pruprià. U cullettivu teme a signatura imminente, da a prefetta di Corsica, pè autorizà a custruzzione di u novu centru d’interru di u mullizzu  Vighjaneddu 2, prugettu privatu purtatu da Alexandre Lanfranchi.