Attualità

U prufessore José Tomasi hà raghjuntu e stelle

S'ampara cun tristezza a partenza à l'altru mondu di José Tomasi, prufessore è dutttore di storia di l'arte, insignante di prima trinca, artistu passiunatu per a Corsica è a so storia. Avia l'arte di creà, di trasmette è di tramandà. José Tomasi era dinù architettu è membru di l'ordine mundiale di i sperti internaziunali di Genève.

Da u liceu Marbeuf, à quellu di u Fangu, sin'à l'università di Corsica, hà spertu i so immensi sapè à una mansa d'elevi è studienti. Tutti ponu testimunià di l'insignamentu ecceziunale d'issu tercanu storicu d'arte, maestru di cunferenza, chì hà cunsacratu a so vita à l'insignamentu. Era dinù impegnatu in a vita publica in tantu chè cunsiglieru municipale di u paese balaninu di Pigna.

E so esequie seranu celebrate issu luni 11 d'aostu in a capella Santa Croce di Bastia.