Attualità

Libertà per Ferrandi è Alessandri

Una quindecina di membri di u cullettivu chì brama l’avvicinera di Pierre Alessandri è Alain Ferrandi, s’hè introdutta in i lucali di a Prefettura d’Aiacciu. Anu occupatu i lucali è messu una banderina cù e scrizzione “Libertà “ è Libertà per Ferrandi, per dinunzià a sorte di i prigiuneri pulitichi corsi. A so rivendicazione punta a qualificazione di u statutu DSP (détenu particulièrement surveillé), chì l’impedisce d’esse trasferiti in e prigiò di Corsica. E forze di pulizza sò intervenute per caccialli. Durante l’intervenzione, 5 manifestanti sò stati feriti è dui pulizzeri dinù. Materiale di scagnu è mubiglia sò stati sciappati. Lagnanze sò state dipusitate pè entrata illegale in un casamentu amministrativu, viulenze in reunione è distruzzione di materiale. Jean-Guy Talamoni hà  annunziatu avè cunvucatu una reunione di a cunferenza di i presidenti di i gruppi di l’assemblea di Corsica 'per circà inseme di trattà un prublema di fondu'. L’eletti di l’uppusizione anu ricusatu d’assisteci. Jean-Guy Talamoni è Petru Antone Tomasi, presidente di u gruppu Corsica Libera à l’Assemblea di Corsica, anu dumandatu dinù a partenza di u prefettu. Dopu à st’incidenti, ci eranu addunite di sustegnu in Bastia è Corti.