Attualità

Madonna vandalisata in Purtivechju : i suspetti sott’à cuntrollu ghjudiziariu

L’indignazione hè generale in Corsica dopu l’attu di vandalismu cumessu contr’à a statua di a Madonna in Purtivechju. L’inchiesta aperta da a gendarmeria di Purtivechju hè sbuccata nant’à l’arrestazione di dui omi. Sò piazzati sott’à cuntrollu ghjudiziariu sin’à a so audienza fissata u 16 di nuvembre davant’à u tribunale curreziunale d’Aiacciu, induv’elli seranu ghjudicati per sgradazione grave in reunione è esibizione sessuale. Sò d’altrò interdetti di seghjurnà in Corsica. Eri sera ùn anu pussutu piglià l’avviò, impediti da un cumitatu d’accolta chì hà resu e so cundizione d’imbarcamentu particularmente difficiule. Per ragiò di securità, u cummandante à bordu ùn l’hà micca autorizati à imbarcà è i dui omi sò stati custretti di vultà in Aiacciu, una notte di più.