Attualità

Numerose addunite di parenti d’elevi contr’à suppressione pussibule di classe

I parenti d’elevi di San Giulianu anu bluccatu eri l’accessu à a scola Gracieuse Chiararelli, cù u sustegnu di parechji eletti di u rughjone. Dinunzianu a mancanza d’insignanti per a prussima rientrata, dop’à a partenza effettiva à a ritirata d’una stitutrice, ciò chì susciterà a chjuditura d’una classa. Un muvimentu di cuntestazione chì i parenti d’elevi intendenu di prusegue sin’à luni. Sta mane hè dinù a sculuccia di Vanga di l’Oru in Santa Maria Poghju chì manifesteghja à so scuntentezza contr’à u risicu di chjuditura d’una classa à a prossima rientrata. D’altrò, in Bastia, ci hè una mubilisazione di parenti à a scola Jean-Toussaint Desanti chì chjamanu à bluccà u stabilimentu luni matina. U scopu hè d’alertà dinù nant’à e cundizione di scularità di l’elevi. I parenti d’elevi sò dinù mubilizati in Vivariu. Una reunione era prevista trà a Direzzione Accademica di i Servizii di l’Educazione Nazionale è i sindicati di l’Educazione Naziunale ssu marti dopu meziornu. Intantu petizione sò aperte nant’à internet. Dumenica, una mubilisazione si ferà dinù nant’à a strada territuriale 20.