Indè noi

Sampieru Corsu adattatu pè a radiu Voce Nustrale

U drama liricu “Sampieru Corsu” d’Henri Tomasi, traduttu in corsu da Ghjacumu Fusina, libracciolu di Raphaël Culioli, serà cuntatu nant’à Voce Nustrale da attori abitanti di u paese di A Porta. L’adattazione à a radiu hè di Bernard Ventre, animatore cù a so sposa di l’emissione “Spassighjata musicale” nant’à Voce Nustrale pè l’amatori di musica ogni dumenica à 4 ore cù una ridiffusione mercuri à 7 ore. St’adattazione nova serà diffusata mercuri l’8 è sabbatu l’11 di ghjugnu à 11 ore, venneri u 17 à 2 ore. Altre prugrammazione sò previste cù a Federazione Corsa di e Radiu Assuciative. 

Sampieru Corsu, unu di i più famosi Corsi, hà sempre cumbattutu i Genuvesi. L’opera d’Henri Tomasi conta a so vita, u dramu di u so coppiu è a so musica crea l’ambienza d’ogni attu. In u primu, a vuceratrice ramenta cù forza i mali di a Corsica, marturiata da i so oppressori. In u secondu, si sente a nanna angusciata di Vannina. In u terzu, a morte è a scapera di Sampieru.