Voce Nustrale

Corsica
28 d'aprile

U Scunfinamentu serà prugressivu

U Primu ministru Edouard Philippe hà presentatu u pianu pè urganizà u scunfinamentu à parte da l'11 di maghju. Hà prupostu una riapertura prugressiva di e scole materne è elementare à parte da stu ghjornu. Dopu, in i cullegi, e classe di Sesta è Quinta puderanu riapre à parte da u 18 s'elle si trovanu in e zone induve a circulazione di u virus hè assai debule. E maschere seranu obligatorie in i trasporti publichi. U teletravagliu deverà cuntinuà induv'ellu hè pussibule. U scunfinamentu puderà esse attempatu s'ellu ci hè una crescita di u virus da quì à l'11 di maghju. Infine, à parte da u 2 di ghjugnu, una seconda fasa di scunfinamentu serà decisa cù nove misure chì dipenderanu da l'evuluzione di l'epidemia.

Edouard Philippe hà annunziatu d'altrò chì e mediateche, bibliuteche è picculi musei riapreranu l'11. I grandi musei, cinema, teatri è sale di cuncertu seranu sempre chjosi. A stagione di ghjocu à pallò 2019-2020 hè compia. E manifestazione spurtive è i festivali cù più di 5000 persone ùn puderanu esse organizati nanzu settembre.

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza