Attualità

Timpesta Ciara : numerosi incendii è circulazione interdetta

L’isula hè sempre in vigilenza arancia per fenomeni di venti viulenti in raggio di u passagiu di a timpesta Ciara. Sbuffulate sin’à 200 ch/o sò state arregistrate è i porti di Bastia è l’Isula è u campu d’aviazione di Poretta sò chjosi è i veiculi di trasportu in cumunu è di trasportu di marcanzia anu l’interdizzione di circulà .

Altre cunsequenze di u ventu sò l’incendii , quellu di Quenza induv’è 1500 ettare anu brusgiatu hè ammaestratu mà hè sempre sott’à surveglianza. I suldati di u focu sò intervenuti parechje volte eri in Poghju Mezzana 20 ettare anu brusgiatu , 2 ettare in Rutali ,in Pietracorbara e fiamme anu parcorsu digià 70 ettare è per l’ora u focu ùn hà più evuluatu . In fine eri sera un incendiu s’hè dichjaratu in Olmeta di Tuda è hà brusgiatu per l’ora 250 ettare .