Nutiziale culturale

U dischettu “Da noi à voi” di A Ghjuventù cerviuninca esce u 19 di maghju

L’associu Ghjuventù cerviuninca serà in Montpellier a fine di settimana di u 16 di maghju pè dui cuncerti di prima trinca in chjesa di Vic La Gardiole è in core di u duminiu viticulu di u Mas. Dopu, da quì à qualchì ghjornu, u gruppu hà da esce un dischettu di cinque canzone ”Da noi à voi”, cum’è una leia cù u publicu, arrigistratu à Atom studio in Lucciana. Frà i tituli, omu ritrova u famosu cantu d’amore à “Cervioni”, cumpostu da Ghjuvanni Simonetti, unu di i successi d’Antone Ciosi. Omu u stà à sente cum’è un omagiu à l’autore è un attaccamentu pè l’identità cerviuninca.

L’altre canzone di stu primu dischettu sò “L’Aventurieru” è “Dateci strumenti” di Tittò Limongi, “Stu cantu” di Nicolas Graziani è “Russignolu” d’Antonu Marielli. I musicanti sò i chitarristi Lisandru Bellagamba è Louis Ferretti, Dumè Peretti à u cajon, Louan Moser à u viulinu è Pierre-Paul Pieri à a bassa. A surtita ufficiale hè prevista u 19 di maghju. D’altrò, in l’attualità di u gruppu, un’altra nutizia festosa hè chì l’associu festighjerà i so dece anni durante un spettaculu musicale u 20 di ghjugnu.