Voce Nustrale

Nutiziale culturale

Bastia
10 d'aostu

Amlet, U Teatrinu presenta a so adattazione di Shakespeare in lingua corsa

Pè a so nova opera, a cumpagnia U Teatrinu hà sceltu d'adattà in lingua un capu d'opera : Hamlet di Shakespeare, diventatu Amlet. A prima riprisentazione era u 10 d'aostu à u Palazzu di i guvernatori in Bastia. 'Certe scene sò esciute da a pezza originale. Altre sò creazione chì leianu a storia à u nostru cuntestu attuale', preciseghja u rializadore Guy Cimino. 'Hamlet hè l'opera a più adatta à a Corsica d'oghje. Ci rimanda à a viulenza di a nostra epuca'. À meza strada trà passatu è presente, U Teatrinu hà sceltu di parlà di sugetti di sucetà, ind'una storia nata à u XVIIu seculu, per esempiu e viulenze cunghjugale è altre prublematica di a sucetà corsa.

Ùn si tratta di dibatte o di spiecà ma d'iscrive a pezza ind'una rialità cuntempurana è isulana. Amlet ferma quantunque una tragedia, ancu sì e scene aghjustate sò comiche. Dunque, ci vole à truvà un equilibru trà tragedia è risa. Amlet hè a terza pezza di Shakespeare adattata da U Teatrinu in lingua corsa. Un universu, una scrittura, tematiche è storie chì parenu cunvene d'incantu à a cumpagnia. 

L'altre date di u giru : i 12, 13 è 16 d'ottobre in Furiani, u 14 d'ottobre à u CCU di Corti.

Spassighjata in e Preziose ridicule : u 14 d'aostu in Olmi è Cappella pè i 23esimi scontri internaziunali di teatru, U 25 di settembre à L'Aghja in Aiacciu, u primu d'ottobre à u centru culturale di Purtivechju, u 19 di nuvembre à u centru culturale di Biguglia, u 18 di ghjennaghju à u CCU di Corti. 

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza