Attualità

Anthony Quilici vince u Casinca Trail

Nimu hà pussutu batte Anthony Quilici nant'à i chjassi casinchesi à l'occasione di a novesima edizione di u Casinca trail urganisatu da l'associu di Penta di Casinca, I Chjassi Antichi. Hà dinù firmatu una nova prova nant'à a 20 chilometri in 1 ora 46 minuti è 8 seconde, davant'à Leo Serca è Alexandre Muselli. A prima feminile, Amandine Dumas, compie à a novesima piazza di u generale.

A 12 chilometri hè stata vinta da Fabien Olmeta ch'hà fattu onore à a so squadra casinchese. U giovanu cerviunincu François-Louis Arena, compie à a 9 ima piazza è vince a prova di a categuria junior. A prima feminile, Laura Estournes hè 18 ima di a classifica. 

Una corsa corta di 6 chilometri hè stata aghjustata à u prugramma induve a ghjuventù s'hè distinta occupendu e dodeci prime piazza di a classifica. Hè stata vinta da Carlu Santoni, giovanu bastiacciu, davant'à u calvese Sylvain Montet è l'aiaccinu Mathieu Sanchez. Indè e donne, Elisa Perrier s'hè imposta davant'à Laurianne Battistini, di u Viscuvatu.