Attualità

Autonumia Femu a Corsica chere una cunsultazione referendaria

Addunitu in urgenza eri in Corti, u Cunsigliu Naziunale di Femu a Corsica hà chjarificatu a so pusizione dopu u ricusu di u Senatu pè u prugettu d’autonumia pè a Corsica. U partitu autonomistu puderebbe ripiglià e discussione in Parigi sì e rivindicazione naziunaliste sò pigliate in contu. Ma sì u blucchime ferma, hà da prupone, nanzu à a fine di l’annu, l’organisazione d’una cunsultazione referendaria nant’à l’esistenza o nò di u populu corsu, o a brama o nò di un’autonumia legislativa. Infine, Femu a Corsica invita e furmazione naziunaliste chì anu sustenutu Beauvau à ritruvassi in i prossimi ghjorni pè fissà una pusizione cumuna nanzu d’allargà e discussione à l’altre forze pulitiche è “forze vive” favurevule à u prucedimentu.