Attualità

Buriane eccezziunale in a Restonica

Corti hè statu eri l’epicentru d’un episodiu meteorologicu assai agressivu cù una forte intensità d’acquate è sopr’à tuttu una cullata d’acqua subitanea quant’è eccezziunale da a Restonica è u Tavignanu.  U ponte di Baliri digià dannighjatu in 2021 è rimessu in statu in 2024, hà risicatu d’esse paratu da a fiumara chì hà traversatu a cità curtinese. Dop’à l’evenimenti accaduti in piaghja urientale è in u rughjone di Purtivechju,  u tempurale hè statu d’una rara intensità per a terza volta in un mese. Eri, per via e forte ventate in u sudu di l’isula, voli in partenza è in ghjunta di l’aeroporti d’Aiacciu è di Figari, sò stati annullati, è in u portu d’Aiacciu parechji battelli si sò affundati.