Voce Nustrale

Nutiziale culturale

Cervioni
27 di lugliu

Detti di pastori è Ghjochi zitellini, cun Petru Ghjuvanni Luccioni è Petru Casanova

Cun a seria pastori di Corsica, à l’edizione Alain Piazzola, Pierre-Jean Luccioni tramanda a lascita di i pastori corsi. L’opera hè maiò.

 

U primu numeru « Usi sacri è prufani », hè un antulugia cunsacrata à i pastori di Corsica . Ci sò stati dopu  «Capraghji è pecuraghji » chì ci anu fattu scopre i casgi, e razze è a cundotta di e bande d’animali. U numeru 4 hè cunsacratu à u pastoralisimu à traversu a storia. Fidele à l’Adecec, Pierre-Jean Luccioni ci hà rallegratu di a presentazione ufficiale di u quintu vulumu chì tratta di Circondi è detti di pastori.

 

Un antr’opera esciuta à l’Edizione Alain Piazzola, à prò di a memoria culletiva, nant’à i passi di st’omi, donne, famiglie, ch’anu vissutu à u ritimu di u mistieru u più vechju di u mondu. Dop'à Pierre-Jean Luccioni, hè tocca à Jean Castela di schjarisce i propositi di l'autore, fendu l'analisi di e carti di muntagnera.

 

L’aspettavamu cun tanta brama issa ghjurnata chì ci duvia dà a  cusi bella occasione di riceve qui in Cervioni, u nostru amicu Petru Casanova. S’hè fatta quella stonda, ma senza Petru Casanova. A 100 anni, ùn si pò micca sempre move cum’omu vole.

 

A stonda era di primura. E’ chì onore di participà à l’esciuta ufficiale di a seconda edizione d’Appellamanu di Petru Casanova, chì vene d’esce inde Alain Piazzola.

 

Petru Casanova è l’Adecec, ghjè a leia d’una vita sana. Di spartera, di creazione, ma dinù è soprattuttu d’affezzione.

In  qualchi parulla, l’adecec hà publicatu Petru Casanova u librettu Usanze corse, e fune, in l’annate 80, u lessicu di a vigna è u vinu è u libracciolu Vigna è vinu nustrale, A Misgiccia, issa pratica misgicciaghja, cantilagnu arradicatu in la cuscenza nustrale,  U conte di Salomone nant’à u fà è l’infà di a luna, è po dinu, u lessicu ghjocu è ghjoculi, in 89, stabilitu à parte di u libru Appellamanu.  Ci simu nutriti di u stintu corsu d’un omu, ingordu d’amparera è di tramandera.

 

Ne hè sempre cusi. A 100 anni, petru Casanova ci rallegra di u so ochju maliziosu, sempre un cerca di sapè fà, di sapè dì, è di sapè dà.

Ringraziemu à Ghjacumina Acquaviva-Bosseur chi hà mantenuta a leia trà noi è u nostru Petru Casanova. Ci hè fatta a « porta voce » di st’omu  cusì attaccatu à a cultura corsa, impegnatu ch’ellu hè statu à ch’ella ùn si perdi in u giravolta di u tempu chì passa, è chì sguassa. Li femu a prumessa di prusegue à so opera, è di seguità u so cunsigliu « siate curiosi di tuttu ciò chè intornu à a vita, passata, ughjinca, è à vene ».

 

Issa ghjurnata hè stata per noi l’occasione di dilli à alta voce « Vi ringraziemu Petru Casanova », pigliendu i zitelli appellamanu per una bella stonda di ghjochi nustrale!

 

Di u ghjocu, eccu ciò ch’ellu nè dice Petru Casanova :

 

Ghjuchemu ! parolla zitellina magica. « Ghjuchemu !» à sentene a voce anc’ oghje, u termine m’introna in mente. Iè parolla più bella ùn ci nè po esse.

 

Pè i zitelli, u ghjocu hè più ch’un passatempu. Divertesi à trascioglie difficultà è altri intuppi, esercitassi à supranassi, à vince,  à perde senza puntiglià, ghjè senza accorgesine appruntassi à ad’aspettà l’incerti di a vita.

 

A maiò parte di i novi ghjochi d’avà, pè lu più, riguarati in l’ordinatori mettenu à ghjubidòmine i giòvani, rinfurzendune a rimitizia.

Epuru chjamati suciali o educativi, ò zitelli, attenti à i pezzi!

S'hè passatu ind'è noi

Jazz in Aiacciu si movi in Cervioni

23 d'aostu | Cervioni

Inziritura in Cunventu d'Alisgiani

18 d'aprile | Costaverde

San Roccu in Chigliacci

17 d'aostu 2019 | Cotone

Addiu à Simon-Jean Riolacci

17 d'aostu | Valle di Campuloru

U mercatu di l'avventu in Pedicroce

7 di dicembre 2020 | Piedicroce

Ottobre rosulu: marchja sulidaria in Fulelli

21 d'uttobre 2019 | Fulelli

I presidenti di e 13 SAFER in Corsica

18 d'uttobre 2019 | Corsica

U festivale d'autunnu in Castagniccia

12 d'uttobre 2019 | Corsica

E belle serate di u Settembrinu

29 d'aostu 2019 | Costa Verde

Da Cervioni à Campudonicu

13 di lugliu 2019 | Cervioni

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza