Nutiziale culturale

Inziritura in Cunventu d'Alisgiani

Pasquale Ottavi, vici presidente di a CCCV è persona referente per a gestione di u Covid, ci rallegra (s'ellu si pò dì ) d'una puesia ispirata da a ghjurnata di vaccinazione urganisata in cunventu d'Alisgiani da a cumunità di cumune di a Costa Verde: 

Tuttu ugnunu ormai sà
Li guai di la pandemia 
È francà si vole avà 
Da quessa a brutta epidemia
D’ottene una piccatura 
Era eri la primura

In cunventu d’Alisgiani
Ci hè stata l’animazione
Appressu à la inziritura
Ghjunta era a pupulazione
S’hè mossu lu parsunale
Puliticu è midicale 

Un ringraziu sia fattu
Ad infirmiere è duttore
Rispittatu anu lu pattu
Di curà senza timore
La salute di la ghjente
Di quella valle à l’oriente

Tocca à salutà dinò
Quellu nostru prisidente
Micca cà in piaghja quaiò
In Costa Verde ci hè ghjente
Ellu hà dettu cun ghjudiziu
Ci vole à rende serviziu

Ci vole à rende serviziu
À li nostri muntagnoli
È po l’azzione à prupiziu
Dicisu hà pè i figlioli
Di ssa valle alisgianinca 
Lu male po ch’ella vinca

S’ella ci hè una parsona
Chì nun hè da sminticà
Chì lu so nome risona
D’una chì pò mirità
U ringraziu di noi tutti
O Sandrì mille saluti !