7a Alisgianinca Trail dumenica u 16 di ghjugnu

L’iscrizzione sò aperte nant’à u situ sportimers.com. Sta cumpetizione hè stata inaugurata da l’associu Ghjuventù Alisgianinca u 12 di ghjugnu di u 2016. Stu gruppu di giovani organiseghja evenimenti spurtivi è culturali spieca u vicipresidente David Poli. U trail hè un evenimentu spurtivu ma micca solu. Ghjè l’occasione di dinù di fà vene a ghjente, di fà scopre a regione, di riapre chjassi chjosi dapoi anni è anni è di mette in risaltu certi lochi chì eranu diventati inaccessibili. Quist’annu 3 percorsi à u prugramma partendu da u cunventu d'Alisgiani:

- E TRE PIEVI 23 chilometri/ 1600m D+ : 25 euri

- SANT'ALESIU 12 chilometri / 800m D+ : 20 euri

- Marchja 6 chilometri / 800m D+ : 15 euri

U locu u più altu di u trail hè a Punta di Caldane à 1724 metri. E corse si raghjunghjenu à a cappella Sant’Alesiu. Da custì, u chjassu hè cumunu pè vultà in cunventu d’Alisgiani, locu di partenza è di ghjunta di sfarente corse. Davant’à l’edifiziu, i participanti è u publicu si ritruveranu ingiru à un tavulacciu è seranu rimessi i premii.

Pè appruntà l’Alisgianinca trail, l’organizazione si face cù 120 benevulenti accumpagnati da una squadra medicale. Pè a prima tappa, ci vole à appruntà i chjassi. Secondu i casi, sò i chjassi di a Cumunità di cumune, di u PNRC (Parcu Naturale Regiunale di a Corsica) o altri chjassi chì l’associu hà apertu è intrattene durante l’annu.