Nutiziale culturale

I sogni di Sonia dumenica u 9 d’aostu, corte di u museu di Cervioni à parte da 9 ore è mezu

Sonia, interpretata da Davia Benedetti, pè un spettaculu sola in scena in lingua corsa durante ottanta minuti. Ghjè un’adattazione di “Les inconstances” d’Alexandre Oppecini. A l’iniziu, ghjè Marie-Pierre Nouveau ch’avia u rolu in lingua francese. U tema hè a piazza di a donna in a sucetà. Sonia hè una donna chì, frà altru, butula sola contr’à a vita in a so sala di bagnu. Sò numerose e donne chì facenu cusì per via chì campanu cù paghe chì ùn li permettenu di campà sole, soprattuttu cù figlioli à mantene. U spaziu di a sala di bagnu hè u solu locu induve si sente bè, induv’ella pò accurdassi tempu per ella, micca solu pè appruntassi ma dinù butulà, sunnià, inventassi una vita. Sonia paraguneghja dinù a so vita oghjinca à i so ideali è i so sogni di giuventù, in particulare quandu, studiante in BTS, avia participatu à l’emissione Popstars. U persunagiu face ride, riflette, cummove dinù è viaghjà in u mondu mustrendu à tempu tutt'a putenza è a dulcezza d'una donna corsa di u XXIu seculu. A traduzzione è l’adattazione sò di Roselyne de Nobili è Filippu Guerrini.

Davia Benedetti ùn hè micca solu un’attrice è ballarina. Hè insignante cercadora à l’università di Corsica, specialista in l’antropolugia di u spettaculu, direttrice di u Centru Culturale Universitariu. Malgradu una vita prufessiunale assai carca, riesce à esse una teatrina attalentata. Dunque, puderete apprezzà a so perfurmenza in sti sogni di Sonia. Un spettaculu offertu da a merria.