Attualità

Linee versu Marseglia è Nizza : a DSP attribuita à Air Corsica

L’eletti di l’assemblea di Corsica anu adduttatu à l’unanimità u raportu nant’à l’attribuzione di a DSP di tutte e linee trà i quattru campi d’aviazione isulani è Marseglia è Nizza à a cumpagnia Air Corsica. Hè stata scartata l’ufferta di a cumpagnia Low Cost Volotea chì s’era pusiziunata nant’à e rutazione da Bastia è Aiacciu versu Marseglia. Ci vole oramai aspettà u mese di marzu cuncernendu a desserta di Parigi.

Mentre chì l’eletti di l’assemblea di Corsica s’approntavanu à entre in sessione per vutà l’attribuzione di e linee bordu à bordu, più di 400 persone si sò addunite davanti à a Cullettività à a chjama di u sindicatu STC, chjamendu l’eletti à “Vutà bè”.