Nutiziale culturale

Secondu festivale Cine Donne da u 22 à u 29 di marzu

Da u 22 à u 29 di marzu, si tene u secondu festivale Cine Donne. Michèle Corrotti, presidente di u festivale Arte Mare, hà previstu a diffusione di numerosi filmi in i cinema Régent è Studio di Bastia, Furiani, u centru culturale Carlu Rocchi di Biguglia, è a cinemateca Galaxy di a cumuna di Lecci da u 30 di marzu à u 6 d’aprile. 5 seranu diffusati nanz’à a so surtita naziunale è avemu dinù documentarii nant’à e rializatrice Iciar Bollain, Agnès Varda cù diffusione di filmi. A manifestazione hà invitatu frà altri l’attore Alexis Manenti, a rializatrice Lucie Borleteau chì presenterà u so filmu “À mon seul désir”, senza scurdassi di una mostra à a galleria Noir et Blanc di l’opere d’Arlette Schleifer è una cunferenza nant’à a scrittrice Marie Susini sabbatu u 25 di marzu à duie ore. Stu festivale mette in risaltu l’impurtanza di a cuntribuzione di e donne in u mondu di u cinema è e so difficultà pè di più ugualità è ricunniscenza. U fattu si stà chì hè sempre luntanu u scopu di a parità, sceltu da u cullettivu 50/50. Segondu l'Osservatoriu eurupeu di l'audiuvisivu, per ciò chì tocca u perìudu 2016-2020, e donne ripresentanu menu d'un realizadore nantu à quattru in Auropa, 33% di i pruduttori è 27% di i scenaristi chì travaglianu nantu à i filmi è a ripresentazione di e donne a più debule a truvemu cù i direttori di a fotografia è i cumpunidori. Dunque, s'ella prugredisce a parità, hè à passu rallentitu.

Cù Cine Donne, si tratta di porghje un spaziu di riflessione è di discussione à l'associ impignati in a lotta per l'ugualità di generu, pulitica, ecunomica, culturale, suciale è ghjuridica. Allora in stu mese di marzu, femula cumpiita. Spartemu in alegria cù un publicu cuncernatu è interessatu sti filmi di finzione, ducumentarii, chì ci portanu à cambià u sguardu nantu à e donne, à scunvoglie i stereutippi, à inventà u mondu un'altra volta.