Attualità

Timpurali in Corsica: 120 persone evacuate in Purtivechju

Issu ghjovi u rughjone di Purtivechju cunosce novi episodii di timpurali. 120 persone sò digià state evacuate. Sta mane l’abitanti sò stati infurmati da un missaghju FR-Alert di a vigilenza arancia chì tocca u rughjone purtivechjacciu. I settori di Purtivechju, l’Alta Rocca è Figari sò particularmente cuncernati è un novu episodiu timpuralescu hè previstu issu dopu meziornu, è sta notte circ’à una è duie ore. A u COSEC di Purtivechju induve e 120 persone evacuate sò accolte, una distribuzione di manghjusca hè assicurata. U merre Jean-Christophe Angelini è Anthony Barraco, sottu prefettu di u circondu, sò ghjunti sopr’à locu per scambià cun l’abitanti sinistrati. 

Una famiglia chì stà à u livellu di u fiume Bala hè stata evacuata in fine di matinata, dop’avè passatu duie ore nant’à u tettu di a son casa. A so banda di capre hè stata anch’ella evacuata. Una parte di u ponte di u Bala hè stata sradicata da a fiumara nant’à a strada di Muratellu chì hè bluccata. Parechji animali di cumpagnia sò stati dinù salvati da i numerosi succorsi mubilizati. 

L’accessu à u chjassu di spassighjata GR 20 è à tutti l’altri chjassi di Cismonte hè interdettu.