Attualità

U prucedimentu Beauvau ripiglia fiatu

Dopu à a reunione di u quartu cumitatu strategicu, Gérald Darmanin hà dichjaratu ch’ellu aspettava oramai una 'deliberazione' di l'Assemblea di Corsica nant’à a quistione di l’autonumia è pruposte nant’à u fundiariu, l’alloghju, l’urbanismu… da quì à a fine di ghjugnu. Dispusizione contr’à a speculazione immubuliaria puderebbenu esse vutate senza mudificà a Custituzione. In quant’à u statutu di residente, u ministru di l’internu preferisce un statutu di residenza chì permetterebbe à e persone campendu in Corsica dapoi parechji anni d’accede più facilmente à un alloghju. Una mudificazione custituziunale hè pussibule in stu quadru. Dopu à a reunione, l’eletti si sò detti rassicurati nant’à a cuntinuità di u prucedimentu, chi pare ripiglià fiatu.