Cinetica, ondecesimi scontri di u filmu d’animazione in Bastia, da u 6 à l’8 di nuvembre, Centru Culturale Una Volta è Cinema Le Régent

U cinema d’animazione hè assai assai creativu. I filmi prudutti ùn sò mai stati cusì numerosi è Cinetica, organisata da Cinem’Associu, vi ne prupone una selezzione di prima trinca. A u prugramma dunque, una quindecina di filmi d’autori è autrice, filmi pè tutti i publichi è filmi corti pè interessà i giovani à u cinema. E tecniche di u cinema d’animazione sò assai diverse è originale : mariunette è pasta molle animate in stop motion, animazione di carta frastagliata, animazione 2D è 3D. Pè st’edizione, sò prugrammati in particulare filmi francesi cum”è “Le Corset” di Louis Clichy, “Carmen, l’oiseau rebelle” di Sébastien Laudenbach o “Lucy Lost” d’Olivier Clert, filmi pè adulescenti è adulti : “We are aliens” di Kohei Kadowaki, “In waves” di Phuong Mai Nguyen o ancu u filmu comicu “Jim Queen” di De Marco Nguyen è Nicolas Athan. In quant’à i zitellucci, puderanu scope u cinema cù filmi à parte da trè anni.

Rimarchemu dinù l’opera di e scole bastiacce Campanari, Defendini è Subissi. Difatti, venneri u 6 di nuvembre à 6 ore, u publicu puderà scopre “SOSpace”, un filmu cortu in stop motion scrittu è rialisatu da ste scole in u quadru di u dispusitivu “Comme au cinéma !”. A lingua corsa hè dinù à l’onore cù a diffusione di cinque episodii novi di a seria d’animazione “Tercani di a giungula” (adattazione di a seria francese “Les as de la jungle”) dumenica l’8 di nuvembre à 11 ore di mane, duppiati da l’associu Fiura Mossa. Frà l’altre animazione, u publicu hà da assister à a prima diffusione di “Wildwood, la prophétie de la forêt”, nanzu a surtita ufficiale è di “Blaise”, cù a participazione di i so rialisadori Dimitri Planchon è Jean-Paul Guigue sabbatu u 7 di nuvembre à 9 ore menu un quartu di sera. A giurnalista è insignante Perrine Quenesson serà dinù sopr’à locu pè cummentà i filmi “Un Monde entre nous” è “Méli-Mélo”. I nustalgichi è amatori di u Studio Ghibli puderanu scopre una versione in 4K di u capi d’opera “Si tu tends l'oreille” di Yoshifumi Kondō.

D’altrò, hè prevista una cumpetizione internaziunale di filmi corti studianti permettendu cusì di scopre talenti novi. Ci seranu dinù scontri cù i rialisadori è rialisatrice dopu à e prughjezzione. Infine, attelli d’iniziazione sò previsti pè tutti : stop-motion, lanterna magica, flip book o duppiame di e voce in lingua corsa cù l’associu Fiura Mossa.

Altre infurmazione : https://una-volta.com/cinetica-2026/