Cuncertu di Ghjuventù Cerviuninca è Zambra sabbatu u 14 di nuvembre, catedrale di Cervioni, 6 ore è mezu

In u quadru di a festa di a lingua di u Mediterraniu, a Cullettività di Corsica v'invita à a catedrale Sant'Eramu in Cervioni sabbatu u 14 di nuvembre à parte da 6 ore è mezu. À u prugramma una serata animata da u gruppu tuscanu Zambra è Ghjuventù Cerviuninca. Entrata di rigalu. 

Serà à l’onore un dialogu musicale è linguisticu trà a Corsica è a Tuscana. In prima parte, e voce di a Costa Verde cù a scola di cantu Ghjuventù Cerviuninca chì principierà a serata cù un ripertoriu di canti tradiziunali è pulifunie corse. Una stonda chì mette in risaltu l’identità è a trasmissione di a lingua vicin’à a ghjuventù lucale. In seconda parte, canteranu l’invitati tuscani di Zambra. Senterete i canti, pulifunie è e tradizione musicale di a so regione vicina, illustrendu a tematica di l’apertura è di e leie in Mediterraniu. Zambra hè statu creatu in u 2013 da anziani membri di sfarenti gruppi tuscani. Stu nome hè quellu di u quartieru operaiu di a cità di Sesto Fiorentino induve l’ambiente citadinu scontra l’anziana cultura etrusca di a regione. Infine, l’evenimentu si compie cù una cumunione musicale trà e duie furmazione pè celebrà e so culture è lingue vicine. L’entrata hè di rigalu.