Indè noi

Ghjurnata di l'ADECEC nant'à i Chjami è rispondi

Pè capì e nostre mutivazioni à almanaccà issa ghjurnata ingiru à l’amparera di u Chjami è Rispondi, amenteremu a serata di l’annate 90 urganisata in u quadru di a ghjurnata nant’à i pueti è puetesse ; compia corte di u museu incù i tercani di l’impruvisazione, frà elli, u russignoli è tant’altri

In 2020, annata maladetta d’epidemia, ci simu risicati cun successu à l’urganisazione di a notte di u cantu impruvisatu, trà paghjelle è chjami è rispondi, ma soprrattu dendu a parulla a Anna Catalina Santucci chì tandu era intraccia d’approntà a so tesa nant’à u cantu impruvisatu in Corsica è più particularmente nant’à un arte in mutazione : u Chjami è Rispondi. Paulu Santu Parigi ci avia parlatu anch’ellu di u cantu impruvisatu.

In 2022 l’ADECEC hà urganizatu una ghjurnata nant’à u tema di u cantu impruvisatu, è assestatu un prugramma di studii, di scambii è di canti.

Ghjurnata chì hà permessu di sparte u corpus di e cunniscenze di stu cantu specificu, fendu valè u so aspettu patrimuniale.

A scelta hè stata fatta cù stu primu scontru d’accustà u cantu impruvisatu cù una prisentazione generale di e varie situazioni, sin’à a  tramandera cù tutte l’iniziative è arnesi pè l’amparera. Una ghjurnata di studii cunfidata à Petru Santucci, referente di l’Adecec in materia di Chjami è Rispondi

Cun l’invitati Tuscani, Sardi, Balearini, Baschi, Catalani è Corsi, s’hè parlatu d’'Ottava rima', 'Glosar', 'Bertsulari', è di 'chjam’è rispondi. »

Issa ghjurnata hè sbucciata nant’à ciò che nemu chjamatu « a chjama di Cervioni »  chì cunsideraghjja a puesia impruvisata cume elementu capitale di u nostru patrimoniu è chi l’arte d’impruvisà pò esse insignatu à parte di u primariu ancu si u zitellu ùn ammaestra micca a lingua corsa. Issa chjama signalava ch’ella sia fatta in ssu sensu una ricerca à u livellu academicu andendu versu a ricunniscenza di u cantu impruvisatu

L’ Adecec s’hè ingasgiata è s’impegna di cuncertu cun l’associu VOCE de Pigna, è l’associu di u chjami è rispondi  in issa dimarchja di ricunniscenza di u chjami è rispondi à a patrimoniu culturale immateriale.

Si tratta di ricusnosce, di prutege è di prumove issa forma d’arte. Issa dimarcha hè stata iniziata da l’assemblea di a ghjuventù di Corsica in u 2022 è a so muzione hà cundottu à a scrittura d’un carturale vicinu à u Ministeru di a Cultura. 

U fogliu di sustegnu per chì u chjami è rispondi sia scrittu à u ricensu di u patrimoniu culturale immateriale hè dispunibile

Ci permetterete d’avè una pensata per Petru Casanova partutu à l’altru mondu u 24 di marzu scorsu. Trà Petru Casanova è l’Adecec, a leia s’hè tissata longu a vita. Una leia di spartera, di creazione, ma dinù è soprattuttu d’affezzione.

Ci simu nutriti di u stintu corsu d’un omu, ingordu d’amparera è di tramandera è l’emu fattu a prumessa sulenne d’ùn piantà mai à rendeli umagiu, fendu campà a nostra lingua. Petru Casanova l’hà detta è scritta :  Hè duvere sacru !

Di u chjami è rispondi, Petru Casanova hà scrittu : « Issa pratica hè vera vucazione è queste oghje si cercanu… L’amparera di a lingua nustrale po tirà prufittu à ghjuvore d’isssa antica pratica è scoprene nascote virtù zitelline. Issa sorte hè primurosa è merita riflessione.  Sarebbe tempu di riasgice per salvà un tal tesoru'.

Eccu u nostru scopu

Anna Catalina Santucci : l’amparera di u Chjami è Rispondi

Prufessore di e scole, impegnata in a reta scola corsa, Anna Catalina Santucci hè duttore in culture è lingue regiunale. Un gradu ottenutu à u sustenimentu di a so tesa di dicembre 2022 nant’à u chjami è rispondi, e so carateristiche è modi di spressione. A so intervenzione hà evucatu a formazione di i furmadori

 Tittò Limongi : una sperienza à u primariu, u metudu è l’arnesi aduprati, è un picculu ritornu nant’i risultati. 

Prufessore di e scole in Santu Niculaiu, musicante, cantadore, autore per canterini è gruppu corsi, scrive libraccioli di rime per i zitelli, Mariucciu, Anghjulina, una rima duie è trè, ma hè dinù u pedagocu di u chjami è rispondi 

Ghjuvan Lucca Ciccoli: riflessione è scambiu nant’à u versu di u chjami è rispondi

Prufessore di lingua è cultura corsa à u cullegiu di Cervioni, creatore di u gruppu pulifonicu A Ricuccata.  U versu hè a so seconda natura. Pudimu contà nant’à ellu per l’apertura d’un attelu d’amparera di u chjami e rispondi à u cullegiu di Cervioni 

Francescu Luciani : u chjami è rispondi amparatu à cullegiani

Prufessore di lingua è cultura corsa, puetu di lingua corsa, è impruvisatore, hà fattu a sperienza di l’amparera di u chjami è rispondi in scola 

In un cuntrastu cun Carlinu Orsucci è Liveriu Ancey, avia cantatu : « Marricumandu à i santi, di prutege a nostra lingua è mantene i nostri canti, eppò per cent’anni à vene, chi u chjami è rispondi campi »

Zitelli imparaticci ci anu fattu una dismustrazione di u chjami è rispondi. Ringraziemu Julie Rioli, Baptiste Benedetti, Louis Ferretti è Mathieu Pfister - Nicolai per a so participazione.